Alaitz Otxoa de Eribe, Elhuyarreko kidea eta zientzia.eus webgunearen arduraduna aritu zen aurkezle lanetan. Hizlariak, berriz, Ibon Cancio, Koldo Gartzia, Ines Garmendia, Josu Lezameta, Josu Lopez-Gazpio, Uxune Martinez, Amaia Portugal eta Idoia Torregarai izan ziren.
Pleno aretoa bete egin zen ekitaldirako, eta bertaratutakoek, berrogeita hamar pertsona baino gehiago, barre ugari egin zuten egun batez umorista bihurtutako zientzialariekin. Besteak beste, Ergelen Teoria edota zientzialari eta kazetarien arteko erlazio konplikatua izan zuten hizpide, proiektoreko irudi xelebreez lagunduta. Ekitaldiak ordubete pasatxo iraun zuen, eta horren ostean luntxa egin zuten.
Zientzia, gertuago
Antolatzaileak eta parte hartzaileak pozik zeuden saioaren amaieran ikusleengandik izandako harreragatik. Bigarren bakarrizketa egin zuen Josu Lopez-Gazpiok, Kimika aplikatuan doktorea eta EHUko irakaslea denak, esan zuen "zientzia herritarrei gerturatzeko modu berri eta polita" izan zela Wolfram deuna.
Alaitz Otxoa de Eribe aurkezle eta arduradunak azaldu zuenez, saioa egiteko Bergara aukeratzearen arrazoia Elhuyar anaiek Wolframioa isolatzea bertan lortu zutela. Euskal Herriak elementuen taula periodikoari eginiko ekarpen bakarra da wolframioa; hori dela eta, elementu hori "jainkotu" egin nahi izan dute Elhuyar fundaziotik.
Zapatuan, egun handia
Zapatuan, azaroak 7, Zientzia astearen baitako egun handia izango da. Goizean zehar, zientzia eta teknologiarekin loturiko hainbat ekintza eta tailer izango dira: Geocatching, Practice your music, Robotika azoka, Droneen erakusketa...