Miguel Lazpiur enpresaburuarekin batera izango da liburuaren egilea, Pedro Gomez Damborenea, eta baita Confebask patronaleko idazkari orokor ohi Jose Guillermo Zubia ere, hitzaurrea idatzi duena.
Lazpiur enpresa familia-negozioa da, eta zapatak egitetik, XX. mende hasieran, berrikuntzan oinarritutako makineri eta forja-erreminteri enpresa izatera pasa da. Ekoizpenaren %80 esportatu egiten du. Bezeroen artean automobilgintzako multinazionalak daude: Ford, Mercedes, Volkswagen… eta TIER-1ekoak: Lear, GKN, NTN…
Bergaran oinarritutako enpresak ehun urte bete zituen iaz eta Gipuzkoako enpresa ertainaren adibide garbia da.
Miguel eta Agustin Lazpiur anaiek zuzentzen dute enpresa. Miguelek ardura postuak izan ditu Confebask patronalean, eta bertako presidente izan zen 2005 eta 2011 artean. Espainiako patronaleko, CEOEko, eta Gipuzkoako, Adegiko presidenteorde ere izan da.
Lazpiur enpresak hainbat errekonozimendu irabazi ditu: besteak beste, Eusko Jaurlaritzak 2012an eman zion Korta saria, bere ibilbidearengatik. Kalitate-ziurtagiri gorenak ere baditu, hala nola Urrezko Q-a, 2006an jasoa.
Enpresa txiki eta ertainen gaineko eztabaida
Deustuko Unibertsitatean eztabaida saio baten barruan aurkeztuko dute liburua. Saio horren izenburua Retos y realidades de la pyme: cómo lograr el éxito en un entorno competitivo da. APDko Iparraldeko aholkulari Eduardo Junquerak eta Deustuko Unibertsitateko Ekintzailetza zuzendari Tontxu Camposek aurkeztuko dute eztabaida.
Liburua salgai dago hainbat saltoki ezagunetan.
