Lanbide Heziketarako sailburuorde Jorge Arevalok, esaterako, adierazi du industria sektoreko lanpostuen %76rako Lanbide Heziketa titulua beharko dela 2020an, eta ez dagoela jende nahikorik. Hamar urteren buruan 160.000 lanpostu ordezkatzeko beharra egongo dela adierazi du Arevalok, eta animatu ditu neskak elektrizitatea edo fabrikazio mekanikoa moduko arloetara jotzera, gaur egun inteligentzia omen delako behar dena, indar fisikoa baino gehiago.
Arevalorekin batera, Confebaskeko zuzendari nagusi Eduardo Aretxaga, Lanbideko Lan Aktibazioko zuzendari Gotzone Sagardui eta Emakundeko zuzendari Izaskun Landaida izan dira hizlari jardunaldien lehenengo saioan, Miguel Altunako zuzendari Josune Irazabalekin batera. Bakoitzak egin du bere aurkezpena, emakumeek Lanbide Heziketako espezialitate teknikoetan izan dezaketen eta izan behar luketen lekuari buruz, eta horra iristeko egin beharrekoak ere aipatuz.
Jardunaldiek bihar eta etzi izango dute jarraipena. Soraluze kooperatibara bisita eta tailer eta mahai-inguruak egingo dituzte datozen bi egunetan.
