Auzotarrek eurek erabilera askotariko areto bihurtu dute San Juan baseliza asteotan

Imanol Gallego 2014ko abe. 12a, 09:00
San Juan auzoko baselizaren barrualdea.

Elizek beti izan dute izaera publiko bat, eta asko dira haien inguruan ospatzen diren egun eta festa handiak. Garrantzi hori auzoetan areagotu egiten da eta baselizetako sarrerek elkarte gastronomiko, aterpe eta batzarleku funtzioak betetzen dituzte.

San Juan auzoko elizak, baina, izaera hori galdua zuen 2010ean ondoan duen baserriak su hartu zuenetik. "Suak teilatu zati bat erre zuen eta haren egoera oso kaskarra zen", dio Jexux Agirre auzo-alkateak. "Eliza zaintzeko ardura zutenak gero eta gutxiago ziren, eta eraikinak lan handia behar zuen", esan du Agirrek. Gauzak horrela, duela hilabete batzuk, San Juan auzoko garapenerako taldeak eliza erabilera askotariko areto bihurtzeko prozesua abiarazi zuen.  

Lan handia

Prozesua sakona izan da, eta barruko lanen aurretik teilatua ere aldatu diote. "Erreta zegoen zatia ez ezik, guztia aldatzea erabaki genuen", azaldu du auzo-alkateak. Barruan, aldiz, paretak konpontzeaz gain, aldare gainean dagoen zerua ere konpondu dute, termitak janda zegoen-eta.

Prozesu horrek 50.000 euroko kostua izan du eta Udalak Aldundiarekin batera jarritako 30.000 euroak nahikoak ez zirenez, auzokideen eta inguruko enpresen babesa izan dute: "Diruaz edo auzolanean lagundu digute".

Lanok, baina, ez dute guztion bedeinkapena izan: "Elizak ez digu prozesua erraztu", argitu du Agirrek. 1810ean, Mendizabalen desamortizazioan, erosi zuen auzoak baseliza, eta dokumentuak izan arren, herriko apaizaren lana "ezinbestekoa" izan da. Zenbait bileraren ostean, auzotarrekin eta Gipuzkoako elizbarrutiarekin akordiora iritsi dira; horregatik, baselizan dauden altzari eta imajinak diozesiarenak izango dira aurreratzean. “Ondare hori baina, ez da auzotik irtengo”, azpimarratu du Agirrek.

Irekiera xumea

Auzotarrek, lan handia egin eta gero, domekan, festa bat baino gehiago, irekiera ekitaldi bat egingo dute. 13:00etan hasiko da ekitaldia, eta, bedeinkapenaren ondoren, dantzari eta ganbera-taldeen unea iritsiko da. Horien ostean, baselizak auzotarrak bilkura gune izateko zuen izaera hartuko du. Lehen ekitaldia domekan bertan egingo dute 50 bat auzotarrek, berritu osteko lehen bazkaria egingo dute-eta bertan. Seguruenez, mahaiaren bueltan, baseliza izango den aretoa erabiltzeko ideia asko irtengo dira.

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak