Arratsaldeko zazpietan hasi zen Bergarako San Pedro parrokian Bergarako Orfeoiak eta Oñatiko Abesbatzak elkarrekin eskaini zuten kontzertua. Zuzendari gisa Aitor Biain, eta haren gidaritzapean bi abesbatzak ez ezik, orkestra txikia eta bakarlariak. Bergarako parrokia bete egin zen kontzertua entzutera joandako herritarrez.
Barroko garaira bidaiatu zuten atzo entzuleek, musikaren historiako konposatzaile handienetariko biren eskutik. Antonio Lucio Vivaldi (Venezia 1678 - Viena 1741) italiarraren, eta Johann Sebastian Bach (Eisenach, 1685 - Leipzig 1750) alemaniarraren eskutik.
Italiar konposatzailearen Gloria lanarekin hasi zuten kontzertua. Latinezko meza baten zatia izan beharrean, aparteko lana da. Diseinu zabaleko hamabi mugimenduz osatutako konposaketa ziklikoa da. Pieza ederra, handia, kontraste gogorrez beteta. Instrumentuek zeresan itzela dute obra guztian zehar eta nabarmentzekoa da beste guztien gainetik, Domine Deus-en oboeak duen protagonismoa. Ikuslea liluratzeko modukoa izan zen oboearen solo hori.
Bachen 'Cantata BWV 131'
Ezagutzen ziren Bachen kantaten artean zaharrenetariko da. Sinfoniaz, koruz eta ariaz osatuta, sute baten ondorioz antolatutako penitentzia-zerbitzu baterako sortu zuen 1707an. Bachen lanaren adierazgarri da musikalki; maila tekniko bikainekoa zen Bach, askorentzat inoiz izan den konposatzailerik handiena. Cantata ere teknikoki maisulana da.
Bakarlarien lana
Koruak ez ezik, bakarlariek ere ez zuten lan makala izan. Nere Ibarrak, Oihana Diazek, Ainara Uribesalgok, Gorka Aranburuk eta Karlos Etxanizek, ez zuten erraza teknikoki oso konplexuak diren zatiak interpretatzen; hala ere, txukun aritu ziren.