Asentzio Esnaola: "Tailagintza ez da sekula menderatzen, egunero ari naiz ikasten"

Asensio Esnaola.
Bizitza erdi darama Asentzio Esnaola (Deba, 1924) Bergaran; emazteak hona ekarri zuela onartu ostean, oso gustura bizi dela aitortu du. Domekan 90 urte beteko ditu egurra lantzea ogibide izan duen gizon jator horrek. Urteek garrantzirik izango ez balute bezala, indartsu dago, eta urteurren borobil hau birritan ospatuko du, zapatuan lagunekin eta domekan emaztearekin.

Beti landu izan duzu egurra?
Deban eskola bukatu eta gero, 14 urterekin hasi nintzen egurra lantzen. Etxe ondoan aroztegi bat zegoen, eta bertan lan txikiak egiten hasi nintzen  tailagintza ikasten.

Hemen ere lan bera izan duzu?
Bai; orain, altzariak sinpleagoak dira, lisoagoak. Lehen, etxe guztietako altzarietan artisauek egindako erliebeak izaten zituzten. Kontuan izan behar da herri bakoitzean gutxienez aroztegi bat izaten zela. Orain, Taila Eskolan ibiltzen naiz buru-belarri.

Eskola bat baino gehiago, lagunen arteko bilkura bat da.
Halaxe da, bai; gehienak erretiratua gaude, eta lagun artean tarte on bat pasatzeko elkartzen gara. Nire ustez, afizio polita da.

Zuk maisu lanak besterik ez  duzu egiten?
Laguntzeko nago, baina nire lanak ere egiten ditut. Ez daukat erretiratzeko asmorik.

Zenbat denbora behar da tailagintza menderatzeko?
Menderatzeko? Uf, ni oraindik ikasten ari naiz.

Oraindik?
Egurra elementu bizi bat da eta egunero ikasten da zerbait. Hala ere, eskua bizkor hartzen zaiola esango nuke.

Ia 80 urtez egurra landu ostean, emazteari baino kasu handiagoa egin diozula esan daiteke.
Kar, kar, kar. Ez, ez. Biei antzera, emazteak badaki taila afizioa izan aurretik nire bizimodua izan zela.

Erlazionatuak

Bergarako tailagileek Esnaola maisua omendu dute

Bergara

Bergarako Taila Eskolak omenaldia eskaini dio bertako kide eta maisu den Asentzio Esnaolari, haren 90 urtebetetzean. Duela 25 urte sortu zenetik, e...

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.