Juan Mari Beltran musikari eta musikologoa Bergaran izan da gaur iluntzean, familiei zuzendutako saioa eskaintzen. Ander Barrenetxea eta Andoitz Antzizarrekin batera, Euskal Herriko eskualde guztietako doinu, kantu, dantza eta musika-tresnak ezagutarazi dizkie Zabalotegin batutakoei. Ordu eta erdi inguru iraun duen ibilaldi horretan gaur egun bizirik dirauten zein erabiltzen ez diren soinu-tresnekin disfrutatu zuten parte-hartzaileek.
Musikan ibilbide luzea du donostiarrak: Euskal Herriko musika tresna, doinu eta kantutegi tradizionalean aditua da, eta baita musikaria ere: hamar disko grabatu eta hamaika musikarirekin lan egin du. Irakasle moduan ere ibilitakoa da.
Badira, gainera, hainbat urte kontzertu didaktikoak eskaintzen dituela. Horren harira, honakoa esan digu: "Oso harrera ona duen formatua da. Euskal Herrian zein kanpoan gabiltza; azaroan, esaterako, Belgikan 26 saio eman genituen. Gainera, moldagarria da ikus-entzule kopuru eta edukiari dagokionez". Musika jaiotzetik familian
Familian musika lantzearen garrantziaz ere egin du berba honakoa aipatuz: "Gero eta gutxiago lantzen bada ere, horrela izan da musikaren historian. Jaiotzean haurrek familian dute musikaren aurreneko hastapenak, sehaska kantuen bitartez".
