Las Turquillas finkaren okupazioak oihartzuna izan zuen Espainiako komunikabideetan. Andaluziako Langileen Sindikatuak (SAT) gidatu zuen, eta ESK-ko delegazio batek ere parte hartu zuen. Hona hemen ESK-k dioena: "%40ko langabezi tasa duen lurralde batean, SAT sindikatuak gidatutako okupazioak lur horien erabilpen soziala erreklamatzen du", eta finkak "erabilpen militarra" duela gogora ekartzen du.
Inputatutako ESK-ko kideak Bergarako epaitegian deklaratu beharko du. Eta honakoa dio ESK-k: "Egoera honen aurrean, langileriarengan estatuak eragindako errepresio judiziala eta poliziala erabiltzen duen sistema kapitalistari txartel gorria atera behar diogu", eta dei egin du hilaren 14an, martitzena, epaitegiaren aurrean batzera, 10:30ean. SATek ordezkaritza bidaliko du Bergarara.
SATen hitzaldia
Horrez gain, Euskal Herrian La lucha obrera del pueblo andaluz delako hitzaldia egingo ditu SATeko kide Andres Bodalok. Arrasaten, Ermuan eta Irunen izango da, eta Arrasateko hitzaldia hilaren 15ean, eguaztena, izango da Kulturaten, 18:30ean.
