Napar Feria, Gabonetako produktuen saltoki ezin hobea

Goiatz Arana Begiristain 2013ko abe. 21a, 16:09
Napar Ferian, salerosketan.
Nafarroako produktuak dastatu eta erosteko aukera paregabea izan da eguerdian Bergarako San Antonio auzoan ospatu den Napar Ferian. Horrez gain, herriko sei elkarte nor baino nor aritu ari sukaldaritza lehiaketan, etxeko txikienek animaliak izan dituzte lagun eta Gabonetako postal lehiaketako sariak banatu dituzte.

Erroskilla, barkillo, turroi, txokolate, ogi, gazta, patxaran, foie, ahate konfit, artisau produktu garrapiñatuak... postu askorik ez, baina kalitatezko produktuen eskaintza zabala izan da. Gustura hartu dute herritarrek, eta gaurko bazkaritarako ez ezik, Gabonetako otorduetarako erosketak egiteko ere aprobetxatu dute aukera.

Ondoan jarritako tabernan, gainera, salda eta txorizo pintxoa hartzeko nahiz trago bat edateko aukera izan dute eta gustura egin dute geldialditxoa bertan, barruak apur bat berotu eta haize hotzari aurre egiteko. Neska-mutikoek, berriz, ponien gainean ibiltzeko aukera izan dute. Alai taldeak, bere aldetik, musika jarri dio ospakizunari.

Gabonetako postalak

Festa giro horretan, eguerdian, Gabonetako postal lehiaketako sariak banatu dituzte: 3-6 urte bitartekoetan, Jon Luciok eskuratu du lehen saria; 7-9 adin tartean, Julen Pescadorrek; eta 10-12koetan, Irene Vallek. Aurten, 160 postal baino gehiago aurkeztu dituzte guztira.

Patatak okelarekin

San Antonioko VI. Sukaldaritza Txapelketa ere jokatu da. Herriko sei elkartek parte hartu dute eta goiza eman dute patatak okelarekin prestatzen. Guztiak zeuden onak nonbait, epaimahaiak luze jardun du-eta erabakia hartzeko lanetan: tapa jaso eta zein itxura duen ikusi batean, saltsak zenbaterainoko gorputza duen begiratu eta probatzen segidan, eta patata eta haragi zatiak ondo samurtuta dauden aztertzen eta dastatzen gero. Lapiko batean, bestean... eta berriz atzera ere.

Auzo bertako Gure Ametsa elkartekoei eman diete txapela azkenean; Lasai Toki geratu da bigarren; eta Artatsek egin du hirugarren.

San Tomas egunaz ez dira ahaztu, ordea, eta lapiko artean zartaginarentzat ere egin dute tokia, txistorra apur bat erre eta mokadutxoa egiteko.

Erlazionatuak

Napar Feria Bergaran

Imanol Beloki Unamuno 2013 abe 15 Bergara

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak