Bergara Garbia plataformakoek emandako behin betiko datuen arabera, 4.843 boto jaso dituzte asteburu honetan hondakinen bilketa sistemaren inguruan Bergaran egindako herri galdeketan. Antolatzaileek Gipuzkoako plataformek landutako 11.608 pertsonako errolda hartu dute aintzat. "Horren arabera, %41,7k eman du botoa Bergaran" azaldu dute plataformako kideek.
Emaitzei dagokienez, galdeketan jasotako 4.771 boto bosgarren edukiontziaren alde izan dira (%98,5); atez ateko sistemaren alde 51 boto jaso zituzten(%1,05) eta 21 izan ziren balio gabeko botoak (%0,4).
Bergara Garbiakoak, "oso pozik"
Oraindik ere behin-behineko datuak eskuetan hartuta, Bergara Garbia plataformako kideak gustura agertu dira datuekin. "Orain arte lortu ditugun datuak oso onak izan dira, eta oso pozik gaude" azaldu du plataformako kide Jose Antonio Aperribaik.
Bere esanetan atzo eman zuen jende gehienak botoa. Eguraldiak gehiegi ez duela lagundu zehaztu du, eta Bergara Zero Zaborreko kideei erreferentzia eginaz hainbat jende galdeketa oztopatzen saiatu direla gaineratu: "Hori dela eta giro arraro samarra sortu zen, eta gure beldurra zen horrek jendea beldurtzea. Baina erantzun ona eman dute, eta pozik gaude. Eskerrak eman nahi dizkiegu bergararrei arazo guztien gainetik botoa ematera etorri direlako".
Behin herri galdeketa burututa, herritarrei datuak helarazi eta horren inguruko balorazio egingo dutela iragarri du Aperribaik. "Udaleko agintariek izango dute zer hausnartu" gaineratu du.