Intxorta 1937 Kultur Elkarteak bosgarren ikus-entzunezkoa aurkeztu du: Bergara 1936, gerra eta errepresioa dokumentala. 50 minutuko iraupena dauka eta auzolanean egindako lana da.
Bertan 25 bergararren testigantzak daude jasota, horietatik 10 emakumeak dira eta dokumentalean agertzen dira UHP eta Loyola batailoietan miliziano edo gudari ibilitakoak, gerrako umeak, Bergarako lehen ikastolako ikasleak, edota fusilatutakoen senideak.
Zazpi errekreazio
Ikus-entzunezkoan zazpi errekreazio ere agertzen dira. Hauek, besteak beste: faxistak San Migeletik Bergaran sartzen; Aritznoa Euzko Ikastolako liburuen erretzea edota Osintxuko atxiloketak, fusilamenduak eta Anbrosio Agirreren ihesa. Errekreazio horietan 50 pertsona boluntariok hartu dute parte eta horietatik 40k aktore lanak egin zituzten.
Bost ataletan banatuta
Dokumentala bost atal hauetan dago banatuta; Bigarren Errepublika, kolpe militarrei erresistentzia, matxinatuak Bergaran, bergararrak borroka lerroan eta ondorioak. Bidean galdutakoen memoria aldarrikatu nahi izan dute lanarekin, Juan Ramon Garai Intxorta 1937 elkarteko kidearen hitzetan. Eta DVDaren aurkezpenean izan den Gipuzkoako Foru Aldundiko Marina Bidasorok ere azpimarratu nahi izan du Foru Aldundian memoria berreskuratzeko lanean jarraituko dutela.
Emanaldiak asteburuan Zabalotegin
Ikus-entzunezkoaren 1.000 ale atera dituzte eta salgai jarriko dituzte egubakoitzetik aurrera 12 euroren truke. Gainera, zapatu eta domekan Zabalotegi aretoan ikus-entzunezkoa ikusteko aukera egongo da.19:00etan hasita euskarazko bertsioa emango dute bi egunetan eta 20:00etan hasita, berriz, gaztelaniazkoa.