Bergaran, oraingoz, 130 familiek eman dute auzo-konposta egiteko izena. Badirudi hurrengo gunea Ikerleku kalekoa izango dela eta maiatzaren bukaeran hasiko dira berau antolatzen: "28 familiek eman dute izena. Pentekoste jaien ostean bizilagunekin harremanetan ipiniko gara. Formazioa eskainiko zaie eta zeinek zein kubo erabili antolatuko dugu".
Osintxukoa ere berehala ipiniko dute martxan eta Bolun eta Espaloian ere egokituko dira guneak. Aipatutako horiez gain, herritarren eskaerak jaso ahala gune gehiago egiteko aukera aztertzen joango da Udala.
Labegaraietan pozik
Labegaraietako bizilagunak oso pozik daude auzo-konposta gunearen funtzionamenduarekin. Bost hilabete dira martxan jarri zela eta hamabi familiek erabiltzen dute. "Oso pozik gaude. Teknikariek esan digute konposta ona lortzen ari garela. Gainera ikaragarria da nola jaisten den zabor kopurua etxean", kontatu digu Iñaki Mujikak. Pasa den eguaztenean lehenengo konposta atera zuten eta bizilagunek elkarrekin daukaten ortura eraman ahal izan zuten.