Bergara Garbiaren apustua 5. edukiontzia dela azpimarratu dute eta birziklapen tasak gora egiteko kontzientziazioaren eta heziketaren alde apustu egiten dutela adierazi dute.
Atez atekoaren aurkako plataformako kideek atzoko bilkuran Udal gobernuak Bergara Garbiak jasotako 4.691 sinadurak kontuan ez hartu izana eta 6 hilabetez Jesus Elortza alkatearen erantzunaren zain izan direla ere salatu dute.
Plataformaren esanetan, nahiz eta atez atekoaren ezarpenak atzera bueltarik ez izan, hondakinak jasotzeko sistema horren aurka protestatzen jarraituko dute. Horretarako, atez atekoaren aurka dauden herritarrei dei egin diete, paperez betetako plastikozko poltsak balkoietan zintzilikatzeko.
Bergara Garbia plataformatik, Debagoieneko eta Gipuzkoako beste plataformekin batera, bailara mailako manifestazioa egin nahi dutela ere adierazi dute.