Bilduk eta Aralarrek osatzen duten gobernuak du gehiengoa eta haien botoekin aurrera aterako dute proposamena, azken asteotan zeresan ugari eman duena. EAJ eta PSE-EE atez atezkoaren kontra azaldu dira, baina haien botoak ez dira nahiko izango udal gobernuaren erabakia atzera botatzeko. Edozelan ere, jeltzaleek eta sozialistek mozio bana aurkeztuko dute zaborren kudeaketaren gainean.
Gai zerrendan, 20 puntu
Gaurko gai zerrendak 20 puntu aurreikusten ditu eta zaborren kudeaketaren eztabaida amaiera aldera etorriko da: 16. puntuan, sozialisten mozioa aztertuko dute; jeltzaleek zabor-bilketa ereduaren inguruan landutako proposamena etorriko da jarraian; eta, azkenik, Bildurena: "ahalik eta hondakin gutxien sortu eta hondakinak biltzearen" gaineko mozioa.
Esan bezala, beste hainbat gai izango dituzte mahai gainean, tartean lan erreforma dela eta Bilduk eta Aralarrek landutakoa, PSE-EEk gai beraren gainean aurkeztutakoa edota EAJren beste bat lan merkatua erreformatzeko premiazko neurriei buruzkoa.
Hileroko azken asteleheneko osoko bilkuretan ohikoa denez, puntu denak jorratu ondoren, eskaera eta galderen txanda etorriko da.