Eta atzoko batzarrean ere ez zuten alkatea izendatzerik izan. Bi hautagairen artean zegoen kontua, baina biek ere "pisuzko arrazoiak" argudiatu zituzten, alkate izateari uko egiteko: osasun eta lan arazoak, besteak beste. Horregatik, oraingo eguenean, beste batzar bat egingo dute, 21:00etan Angiozarko saloian. Angiozarko batzarrak erabakiko du hurrengo urteetarako alkatea. "Akta jasoko da, eta Bergarako Udalari jakinaraziko zaio erabakia" dio Mila Elortzak, azkeneko 12 urteotan Angiozarko alkate izan denak.
Hiruzpalau lagunen artean aterako da alkate berria. Izan ere, Angiozarren, 18 urtetik gorako edozein izan daiteke alkate. "Denak gara hautetsi eta hautesle" dio Elortzak. Azkeneko bozketa hautan, gainera, "gauza oso interesgarriak ikusi ditugu; orain arte sekula batzordeetan ibili bareko jendea-eta. Jende berria", Elortzaren esanetan.
Jose Angel Mikeo Angiozarko alkate izandakoa ere iritzi berekoa da: "Seinale ona da. Angiozarren urte gutxi eraman arren, bertakotu direla erakusten du horrek". Eguenean eratuko da batzarra, esan bezala, alkatea ere aukeratuko dute, eta San Migel jaietako domekan egingo da kargu-hartzea.
12 urteko esperientzia
Mila Elortza izan da azken 12 urteotako Angiozarko alkatea eta iritsi zaio agur esateko momentua; halaxe jasotzen du euren araudiak: pertsona berarentzako nahikoa denbora dela, haize berriak ondo datozela eta hori dela epe-muga. Elortzak alkate izateari utziko dio, beraz, baina lanean jarraituko du, berriei laguntzen.
Haren esanetan, oso garrantzitsua da auzoetan alkatea eta batzarkideak izatea: "Euskal Herritik Madrilgo zentralismoa kritikatzen dugu, baina antzeko zerbait gertatzen da herrietan, ahaztu egiten dira auzoez. Hemen, gainera, demokrazia erabatekoa da: ez dago zerrendarik, denok gara hautesle eta hautagai".
Alkate izandako garaitik etxebizitzak egin izana azpimarratu du, auzoan ixteko arriskuan zegoen eskola txikia bizirik mantentzeko adina haur izatea eragin duelako, besteak beste. Aurrera begira jarrita, bestalde, Interneterako edota mugikorretarako estaldura egokia izatea azpimarratu du, AHTrekin duten erronka ahaztu gabe, noski.
Angiozar aitzindari
"Franco hil ondoren, Angiozarren egin ziren lehen hauteskunde demokratikoak; ausartak izan ginen", kontatu digu Elortzak. Eta Debagoienean era honetako bozak egiten dituen beste auzorik ezagutzen duen galdetuta, ezetz erantzun digu.