Altsasu, Ituren-Zubieta, Lantz, Ziburu edo Donibaneko Inauterietan egon ez arren asteburuan Aroztegitik pasa direnek, leku horietako festari buruz lehen baino gehiago dakite orain; tokian tokiko Inauterietako pertsonaia esanguratsuenak ikusi dituzte Bergarako aretoan, tamaina handian: Kotilungorri, zaldiko, Mielotxin, hartza, lamia...
Pertsonaia bakoitzak panel bat du ondoan, bisitariak ikusten ari den hori nor den jakin dezan: izena eta Inauterietan jokatzen duen papera zein den azaltzen da bertan. Argazkiak ere jasotzen ditu erakusketak: sua nola egiten duten, Mielotxin nola dantzarazten duten edota ahariak basoan nola mugitzen diren erakusten dutenak. Ikus-entzunezko batekin borobiltzen da mostra: pertsonaien jatorria eta gune bakoitzeko Inauterietako ohiturak ezagutzera ematen dituen ikus-entzunezko batekin.
Martxoaren 13ra arte egongo da erakusketa Bergaran –martitzenetik zapatura arteko arratsaldeetan 18:00etatik 20:30era; eta zapatu eta domeka eguerdietan 12:00etatik 14:00etara– eta, ondoren, beste herri batetara eramango dute, kontuan izanik ibiltaria dela. Iruñeko Ahari kultur taldea da antolatzailea.
Eguaztenean, hitzaldia
Inauterietako pertsonaien babesean, Aroztegin bertan, Aitzpea Leizaolak –EHUko irakaslea eta antropologoa– hitzaldia emango du eguenean, martxoak 3, 19:00etan: Inauteriak Euskal Herrian. Tradizioaren forma berriak.
