Gaur hogeita hamabi erretiratuk hasiko dute ikasturtea Esperientziaren Eskolan. Denetariko gaiak landuko dituzte; normalean, orain arte ikasteko aukera izan ez dituzten gaiak topatuko dituzte. Ikasturte bakarra izango dute, eta bukaeran, proiektu bat egin beharko dute.
Esperientziaren Eskola 50 urtetik gorakoendako eskola bat da; Donostian hasi zen orain 12 urte, eta arrakasta handia izan du antolatu den Gipuzkoako bailara guztietan. Arrasaten 3. ikasturtea hasi dute aurten.
Eskola aurkeztu dute Mugabe elkarteak -luzaroan Bergaran lan egin duen Arantxa Arrieta ordiziarrak hitz egin du Mugaberen partez-, Barruso alkateak eta Miguel Altunako zuzendari Iñaki Larrañagak. Denak "pozik" agertu dira bergararrek Eskolari eman dioten erantzunarekin. Alkateak eskerrak eman die Mugaberi eta Miguel Altuna institutuari; azken horri, erakutsi duen "inplikazioarengatik", eta esan du Esperientziaren Eskola bat datorrela Udalaren hausnarketarekin: "3. adinak emateko asko dauka eta, proposamen hau jaso genuenean, ez genuen zalantzarik izan".
Ibon Bolinaga arrasatearrak, hango Eskolako ikasle ohiak, bera zelan ibili den kontatu die: "Pentsatzen dugu norberak bere lanbideko gauzak bakarrik dakizkiela, baina gero konturatzen gara ondokoak beste gauza asko dakiela". Bolinagak esan du "giro oso polita" egoten dela, eta "parte-hartze handia" egoten dela.
Horrenbestez, Bergarako 32 erretiratuak bihar joango dira ikasgelara.