Txapelketara sailkatu izana modu oso positiboan baloratu zuen Ander Muruak Goiena paperean, egubakoitzean. Izar handien aurrean jokatzeko aukera ematen ziolako egun batzuk lehenago Senar mendean hartu izanak. Bada, lehenenko izarrari, Elordiri, irabazteko kapaz izan da, eta egubakoitzean esandakoak zentzu handiagoa hartzen du orain: "Onenen aurrean jokatzeak errespetu handia ematen dit, baina nik dena daukat irabazteko". Bada, arrasatearra hasi da errespetu hori galtzen.
Hasiera oso ona
Arrasatearrak partidaren lehen zatian goitik behera menderatu zuen mallabiarra, eta 10-3 jarri zen aurretik. Ordea, gero Elordik erreakzionatu egin zuen, eta 12-7 hurbildu zen markagailuan. Muruak, baina, patxadaz eta buruaz jokatu zuen Gurean, eta berriz ere ihes egin zuen markagailuan, (17-11). Elordik sufritzen jakin zuen partidaren bukaerako hondarrean, eta azkenean, bete-betean sartu zen partidan. Lehiako bigarren atsedenaldian, Gureako frontoiko markagailuak 18-15 erakusten zuen. Etenaldi horren ondoren ere aurrera egin zuen mallabiarrak, eta 20-19 jartzeraino estutu zuen norgehiagoka. Tentsioa nagusi zen unean, baina, Muruak partida ixten jakin zuen, eta amaieran, 22-19 irabazi zuen.
Artolak eta Rezustak galdu
Lau eta erdiko partida horren aurretik, eskuz binakako jaialdia jokatu zuten. Batetik, Iñaki Artola eta Beñat Rezusta aritu ziren, eta bestetik, Iker Larrazabal eta Jon Mariezkurrena. Larrazabalek eta Mariezkurrenak lortu zuten garaipena, Artola eta Rezusta hamasei tantoan utzita.
