Maider Morras Arrasateko alkateak hartu du hitza ekitaldian, eta Urrutia zoriondu du azken lorpenagatik. Era berean, haren lana eta ahalegina aitortu ditu.
Abuztu amaieran lortu zuen Urrutiak nazioarteko txapelketako urrezko domina. Letoniako hiriburu Rigan jokatu zen EJU European Judo Unionek antolatutako Ne-Waza nazioarteko txapelketa, eta Arrasateko judolariak jokatutako borrokaldi guztiak irabazi zituen. Hala, urrea ekarri zuen etxera.
Urrutiak eskerrak eman dizkio Udalari egindako harreragatik: "Oso pozik nago egin didaten harreragatik. Izandako lorpena txapelketan gogoratzea eta merezimendua ematea asko eskertzen dut. Eta eskerrik asko Arrasateko Udalari", adierazi du.
Horrez gain, klubaren eta entrenatzailearen lana ere nabarmendu nahi izan du: "Azkenik, eskerrik asko nire klubari, Desoreka Judo Taldeari, eta nire entrenatzaile den Markel Urrutiari".
