Almortzak nabarmendu duenez, Arrasatek zezenzaletasun handia du, eta horrek erantzun bikaina bermatu izan du urtez urte. Arizmendiarrieta plazan jartzen den zezen-plazak 1.500 lagunentzako edukiera badu ere, sarritan guztiz betetzen da, eta kanpoan geratzen dira sartu ezinik hainbat ikusle. Horregatik, aurten Udalak aurrez jarri ditu salgai sarrera batzuk.
Bergarako Zezenak, entzierroetan
Entzierroetan ohiko ibilbidea izango da aurten ere: zezenak eta korrikalariak Erdiko kaletik igaroko dira, Kanpatorpea zeharkatu, Zerkaostetatik behera jaitsiko dira eta Arizmendiarrieta plazako zezen-plazara iritsiko dira. Berritasun nagusia ganadutegian egongo da: urte luzez Manzarbeitiako zezenak izan badira entzierroetako protagonistak, aurten Bergarako Zezenak ganadutegiko abereak ibiliko dira Arrasateko kaleetan barrena. Bereziak izango dira Bergarako Zezenak ganadutegiarentzat aurtengo sanjuanak; izan ere, iaz, tuberkulosi kasu baten ondorioz, ganadutegiko abere guztiak hil behar izan zituzten, eta Arrasateko jaietan egingo dute berragertzea. "Urduri eta irrikaz gaude, ea gure zezenek eta publikoak ondo erantzuten duten, eta dena ondo irteten den", adierazi du Almortzak.
Euskal Herriko errekortariak
Errekortarien saioak ere aldaketa izango du aurten: azken urteetan Arrasaten jokatu izan den Errekortarien Txapelketaren ordez, Euskal Herriko Errekortarien Ikuskizuna antolatuko dute. Bertan hainbat debagoiendarrek hartuko dute parte: Unai Arana, Anartz Almortza, Blas Cruz eta Jon Maiztegi bergararrek eta Ander Martinez Txino aretxabaletarrak. Debagoiendarrekin batera Ander Gallastegi eta Sergio Zapatero durangarrak arituko dira.
Gaztetxoek, eskola ibiltaria
Eguenean egingo dute errekortarien eskola ibiltaria. Gaztetxoei zuzendutako ekitaldian, 16 urtetik beherakoek gezurrezko zezenekin hartuko dute parte, eta adin horretatik gorakoek, benetako zezenekin.
Almortzak eskerrak eman dizkie zezen-ekitaldiak babesten dituzten arrasatearrei, eta zezen-ikuskizunetara animatzeko dei egin du.