Elkarretaratzean oharra irakurri dute, eta bertan azpimarratu dute: "Unibertsitateak denontzat espazio segurua izan behar du". Era berean, erasoa salatu eta erasotuari babesa helarazi diote: "Erasotuari gure babesa eta elkartasuna adierazi nahi diogu. Izan ere, eraso guztiak eraso kolektibo bezala ulertzen ditugu".
Karranpakeko kideek adierazi dute ez dutela "inolako erasorik onartuko, ez unibertsitatean ez beste inon", eta unibertsitateari "neurri eta ardurak hartzea" dagokiola nabarmendu dute. Halaber, indarkeria matxistaren aurrean nazkatuta daudela azaldu dute, "indarkeria matxistak emakumeak emakume* izate hutsagatik erasotzen ditu".
Oharraren beste pasarte batean gizonei ardura hartzeko deia egin diete: "Ezinezkoa izango da honekin amaitzea gizonek zuen anaitasun eta konplizitate sareekin apurtu arte. Zuek zarete egitura sostengatzen duen pieza. Beraz, hartu dagokizuen ardura".
Amaitzeko, "aliantzak sortzen, gune seguruak eraikitzen eta kaleak hartzen" jarraituko dutela adierazi dute, eta aldarri hauekin amaitu dute irakurketa: "Autodefentsaz unibertsitate feminista eraikitzera goaz", "Erasorik ez erantzunik gabe" eta "Gora borroka feminista!".
22 urteko gizonezkoa atxilotuta
Ertzaintzak 22 urteko gizonezko bat atxilotu zuen astelehenean, sexu-eraso delitu bat egotzita. 22 urteko emakume batek salatu zuen otsailean Arrasateko ikasle-egoitza batean bortxatua izan zela, eta salaketaren ondorioz abiatu zuten ikerketa. Atxilotua epailearen esku utzi zuten, eta Bergarako 2. Instantzia Epaitegiak behin-behinean espetxeratzeko agindua eman zuen martitzenean. Bestalde, Mondragon Unibertsitateak "gaitzespen eta arbuio irmoena" adierazi du gertatutakoaren aurrean, eta erasotuari zein haren ingurukoei "erabateko babesa" helarazi die.
