Adimen artifizialak industrian, ekonomian eta gizartean duen eragina aztertzeko egiten den nazioarteko foro nagusienetakoa da AI Impact Summit goi-bilera. Indian ospatuko da eta Orbik Cybersecurity bertara joan da, Pedro Sanchez Espainiako Gobernuaren presidentearekin batera.
Orbik Cybersecurityk produktu elektronikoentzat zibersegurtasun soluzioak daramatza Indiara. Izan ere, araudia betetzen duten bermea behar dute produktu horiek, eta, Orbikek, hortara bideratutako soluzioak garatzen ditu adimen artifizialaren bidez. "Soluzio horiek produktuaren bizi-ziklo osoa bermatzen duen plataforma propio batean artikulatzen dira, diseinutik hasi eta haren eragiketa eta mantentze-lanetaraino", diote Orbiketik.
Gaur gaurkoz, Orbik plataformak hainbat sektoretan du presentzia: Iberdrolaren azpiestazio elektrikoen zibersegurtasuna hobetzeko erabiltzen da, baita CAFen sistema elektroniko konektatuetan, eta Makineria eta Automatizazio Industrial aurreratuko enpresetan ere bai.
Lankidetza teknologikoa indartzeko
Orbikek Mondragon kooperatiba taldearen babesarekin hartuko du parte goi-bileran. Asmoa da, lankidetza teknologikoa indartzea eta adimen artifizialak eta zibersegurtasunak eraldaketa digitalaren eragile estrategiko gisa duten zeregina balioan jartzea. "Industriaren, berrikuntzaren eta lankidetza publiko-pribatuaren arteko elkarlana funtsezkoa da digitalizazioaren erronka globalei aurre egiteko. Horrelako ekimenek aukera ematen dute ezagutza partekatzeko eta elkarrekin garapen berriak egiteko aukerak sortzeko, burujabetza teknologikoa estrategiko bihurtu den aldaketa garai hauetan", azaldu du Salvador Trujillok, Orbik Cybersecurityren CEOak.
Enpresa "erreferenteekin" batera
Orbikekin batera, bestelako enpresa batzuk ere hautatu dituzte bisita honetarako. Hala nola: Kaleidos, Libellium, Lookiero, Multiverse Computing, 1MillionBot, Sateliot, Sherpa AI, Submer eta Visual Nacert-ekin. Guztiak, Pedro Sanchezekin batera egon dira Eraldaketa Digitalerako eta Funtzio Publikorako Ministerioak bultzatutako misioan. Indiako bisita, 2026ko Dual España-India urtearen baitan egin da.