Adimen artifizialaren "erabilera etikoan, arduratsuan eta ebidentzian oinarrituan" jarri du arreta fundazioak, "kalte neurologikoa duten pertsonen arretan", hain zuzen.
Eztabaida hori osasun arloko agendaren erdigunean kokatu dute, "teknologia horiek jada praktika kliniko errealean eta kalte neurologikoa duten pertsonen bizitzan zuzenean eragiten duten erabakiak hartzeko moduan eragina izaten ari diren testuinguru batean".
Fundazioak "funtsezkoa" den galdera bat mahaigaineratu du: "Nola integratu adimen artifiziala modu etikoan, klinikoan eta gizatiarrez arduratsuan?". Zera esan nahi du horrek: "Neuroerrehabilitazioaren esparruan, teknologia errehabilitazio-prozesuak pertsonalizatzeko, datuetan oinarritutako erabaki klinikoak hartzen laguntzeko, talde profesionalen balioa indartzeko —eta ez ordezkatzeko—, eta pertsona beti arretaren erdigunean mantentzeko erabiltzea".
Testuinguru horretan, osasun arloko profesionalak, ikertzaileak eta askotariko adituak batu dira Arrasaten, helburu argi batekin: "Aztertzeko eta partekatzeko adimen artifizialaren zein aplikazio ari diren jada funtzionatzen ingurune kliniko errealetan, eta zeintzuk diren oraindik erronka eta osasunean aplikatzerakoan kontuan hartu beharreko mugak".
Marisa Merino: "Benetako erronka da"
Ospitalarioak Fundazioa Euskadiko zuzendari gerenteak, Marisa Merinok, azpimarratu du adimen artifiziala ez dela etorkizuna, osasun-arretaren oraina baizik. "Benetako erronka da, nola integratzen dugun irizpide klinikoarekin, etikarekin eta arduraz, profesionalek erabaki hobeak har ditzaten eta pertsonen arreta hobetu dadin".
Gaineratu du, halaber, erakundeak berrikuntzaren alde egiten duen apustua ikerketa aplikatuarekin eta ezagutza praktika kliniko errealera transferitzearekin "estuki" lotuta dagoela: "Ikerketa, berrikuntza eta esperientzia asistentziala uztartuz soilik egin dezakegu aurrera neuroerrehabilitazio-eredu zehatzago, eraginkorrago eta, batez ere, gizatiarragoetara".
Proiektu bat martxan
Ikuspegi hori, hain zuzen, IA4ICTUS bezalako proiektuetan gauzatzen dela diote. Ospitalarioak Fundazioa Euskadik, Biolanekin lankidetzan, bultzatutako ekimen horrek adimen artifiziala erabiltzen du iktusa izan duten pertsonen neuroerrehabilitazioan erabaki klinikoak hartzen laguntzeko.
Gaurko jardunaldiak Ospitalarioak Fundazioa Euskadik neuroerrehabilitazioan duen posizionamendua "indartzen" duela nabarmendu dute, "ikerketan eta osasun-berrikuntzan erreferente gisa, teknologia pertsonen eta profesionalen zerbitzura jartzen duen ereduarekin konprometituta".
