Astoreren salmentarekin, Ternua Groupek bere lau marken biziraupena ziurtatuko luke, eta hartzekodunen lehiaketarekin amaitu. Datozen egunetan argituko da euskal kirol talde ugari jantzi dituen arropa markaren etorkizuna. Konkurtsoko-administrazioaren gertuko iturrien arabera, hiruzpalau enpresak agertu dute Astore erosteko interesa, tartean, Gipuzkoan errotutakoek. Salmenta gauzatzeko enkantea egingo dute notario aurrean, hilaren 23an, ostirala, eta egunean bertan bukatu daiteke prozesua, edo egun gehiagotan luzatu.
Ternua Groupek bere beste hiru markak gertuko enpresei saldu dizkie udazkenean zehar: Loreak Mendian Irungo Borobitex enpresari, 800.000 eurogatik; Ternua Mondragon Talde barruko Dikarri, 1,5 milioi eurogatik; eta Lorpen Ternua taldeko langile izandako talde bati, 400.000 eurogatik.
Ternua Group 2025eko ekainean aurkeztu zen hartzekodunen lehiaketara, 16 milioi euroko zorrari aurre egin ezinda. Enpresako arduradunek esker ona adierazi zuten sare sozialetan, laguntza eta elkartasun mezu ugari jaso zituztelako, eta aurrera egiten ahaleginduko zirela ziurtatu zuten.