Herri-diagnosia genero ikuspegitik lantzeko asmoz, Begirada aldatu, herria eraldatu! proiektua abiatu du Udalak, eta urriaren 31ra arte galdetegi bat betetzeko aukera izango dute herritarrek.
Horrekin batera, espazio publikoak aztertzeko ibilbideak egingo dituzte, irisgarritasuna, mugikortasuna, topaguneak eta bestelakoak aintzat hartuz. Honako saio hauek geratzen dira egiteko:
- Altamira, Santa Marina, Santa Teresa eta Musakola: urriaren 22an, 18:00etan, Toki Argi erretiratuen etxean (Agerre kalea 2 - Santa Marina).
- Zarugalde, Gorostiza, Uribarri, Uribe eta Munar: urriaren 28an, 18:00etan, Uribarriko erretiratuen etxean (Usaetxe plaza 4, 4B).
- Landa-eremuko auzoak: urriaren 29an, 18:00etan, Kulturateko Loramendi gelan –ez da esplorazio-ibilaldia izango–.
Ostean, azaroan, diagnosian ateratako ondorioak partekatzeko eta proposamen berriak jasotzeko tailer parte-hartzaileak egingo dituzte, eta, ostean, urtarrilean, herritarren azken ekarpenak jasotzeko saioa izango da. Parte hartzeko "dei berezia" egin diete zaintzan aritzen direnei, emakumeei, disidentziei, gazteei, haurrei eta adinekoei.