Kirol bizitza osoa egin du Martxel Balanzategik Ointxe!-n. Hain justu duela urtebete aitortzen zion GOIENAri kosta egin behar zitzaiola erretiroa hartzea, taldekideen artean familia osatzen zutelako. Baina bizitzaren legea da, 1992an jaiotako arrasatearra dagoeneko talde nagusiko beteranoetako bat zen, eta denboraldi amaieran agur esatea erabaki zuen. Bada, aurretik ezer aurreratu ez badiote ere –ekitaldia sorpresaz antolatu dute– kapitainari ondo merezitako omenaldia egin diote, taldekideek pasilloa eginda, bere kamiseta oparituta, eta Xabi Igoak bertsoak ere kantatu dizkio. Hunkitu egin da Balanzategi, normala den moduan, eta ondoren etorri da taldekideek egin ziezaioketen oparirik onena, alegia, Salesianosen kontra partidua irabaztea (96-81). Aurrerantzean Iturripeko harmailetan zale bat gehiago izango da Martxel Balanzategi.
Bergarak ere irabazi egin du
Maila berean, Bergara KE Soraluce taldeko mutilek ere irabazi egin dute, 68-72 Dupla Agurainen kantxan. Asteburuko emaitzekin bergararrak laugarren daude sailkapenean, eta zazpigarren daude arrasatearrak.