Lukiek taldeak abiatuko du Kooltur Ostegunen hamaseigarrena. "Belako taldeko Josu Ximun Billelabeitiak sortutako taldea da, oso hirukote indartsua. 90eko hamarkadako grunge taldeak dituzte erreferente eta, jende gazteaz gain, nagusiak ere erakartzen ditu".
Bigarren taldea Peter and the Test Tube Babies izango da – urriak 9–. "Hainbatek sorpresa handia hartu dute. Ingalaterrako punk-rock talde ospetsua da, 1977ko punkaren etiketa dutenen artean. Erreferentziazko talde bat da, ez baitiote sekula jotzeari utzi. Haien lehen diskoak oso erreferentzialak dira jende askorendako eta, gerora ere, jarraitu dute diskoak argitaratzen. Topaketa berezia izango da nagusiendako eta punk zaleendako, nagusiki".
Bilboko Kak! taldeak hartuko du oholtza urriaren 16an. "Talde gazteak ere ekartzen ditugu, noski. 90eko rocka egiten dute, punk ukitu batekin, baina distortsio barik, eta euskaraz, ahotsei garrantzia handia emanda".
Urriko laugarrena Galder izango da; Dut, Kuraia eta Berri Txarrak taldeetan aritu izan den Galder Izagirre irundarraren taldea. "Iaz disko bat atera zuten, oso proiektu ezberdina, elektronika eta popa txertatuta, eta halakoek ere gurean lekua izan behar dutela uste dugu".
Bukatzeko, "aspaldiko lagun bat" dator: Mursego. "Koolturreko lehen denboraldietan egon zen, eta guretzat kuttuna da. Azkenaldi luzean soinu bandekin ari da eta, beraz, oso kontzertu gutxi ematen ditu".
Emanaldi guztiak gaztetxean izango dira eta 22:00etan hasiko dituzte. Sarrera zazpi euro da.
