2023ko abenduan hasi zituzten Arrasate Herri Eskolako Musakola gunea berritzeko lanak, eta aurreikuspena zen ikasle guztiek, Haur Hezkuntzakoek zein Lehen Hezkuntzakoek, 2025-2026ko ikasturtea han abiatzea. Edozelan ere, eta lanak "oso martxa onean" doazen arren, Lehen Hezkuntzako ikasleek Erguinen egin beharko dute ikasturtearen lehen zatia, eskolako zuzendari Iratxe Salaberriak adierazi duenez. "Azken bileran hitzartu genuen urtarrilean hasiko ginela eskolak ematen Musakolan, eraikina ez delako erabilgarri egongo irailerako", zehaztu du –HHkoak Musakolan hasiko dira–.
Era berean, Eusko Jaurlaritzako Hezkuntza Sailak eskolako material berria jarriko du, azkenean, eta abuztuaren amaierarako iritsiko da material hori –mahaiak, aulkiak, arbelak eta bestelakoak–. Hasiera batean, Hezkuntza Sailak erabaki zuen eraikin berria material zaharrarekin hornitzea, eta Arrasate Herri Eskolako Kontseiluak publikoki salatu zuen hori. "Era berean, eskaria egin genien material berria ekartzeko, eta lortu dugu. Horretarako partida berezi bat jarriko dute, hiru ikastetxe gaude-eta egoera berean", dio Salaberriak.
Eraikin berria "oso argitsua" izango dela gehitu du zuzendariak. "Leiho handiak eta zabalak jarri dituzte, eta gelak handiak dira; espazio zabalak daude".
Kezka nagusia: umeen jangela
Datorren ikasturte hasieran talde asko izango dituzte Erguin gunean, eta "gainezka" egongo da, zuzendariaren esanetan. "Urtarriletik aurrera, arnasa hartzeko moduan egongo gara Erguinen", gaineratu du.
Musakolari dagokionez, eskolako zuzendaritza abuztu bukaeran elkartuko da Hezkuntza Saileko ordezkariekin, "udan lanak zenbateraino aurreratu dituzten ikusteko". Kezka nagusia umeen jangela da: "Haur Hezkuntzako ikasleen jangela barrakoi batean egon da orain arte, baina barrakoi hori kendu egin beharko dute patio berria egiteko. Beraz, eskatuko dugu eraikin berriko jangela erabiltzea. Izan ere, irailerako bukatuta egotea aurreikusten dugu. Edozelan ere, baimena beharko genuke horretarako. Espero dugu baimen hori edukitzea".
Patio inklusiboa egingo dute
Patio berrian ez dute plastikozko eta burdinazko elementurik jarriko: "Gure ideia da, behin eraikineko lanak bukatuta, patio inklusibo eta naturala egiteko proiektu bat gauzatzea, Erguingoaren modukoa".