Egun osoko futbol jaia antolatu du Mondrak zapaturako, eta helburua garbia da, Mara San Jose haurraren alde ekitaldi solidarioa antolatzea. Hala, goizeko txapelketan (10:00-15:00) Euskal Herriko hamabi taldetako harrobiko jokalariak etorriko dira, izan ere, 2013an jaiotako jokalariak izango dira aurrez aurre. Eta gonbidatu dituzten taldeen artean daude Reala, Bergara, Santutxu, Gasteizko Aurrera, Ermua, Martutene, Galdakao, Portugalete, Cultural de Durango, Vasconia eta Ariznabarra. Eta noski, Mondrako ordezkari gaztetxoak ere berdegunean izango dira. Gainera, 10:00etatik 14:00etara puzgarriak jarriko dituzte umeentzat, Real Sociedad fundazioaren eskutik.
Jai solidarioan esku hartzeko sarrera 3 eurokoa izango da. Hori ordainduta, Mojategiko sarbideaz batera puzgarrietan jolasteko eta otar baten zozketan parte hartzeko zenbakia eskuratuko da. Hala, zapatuan batzen duten dirua Mara San Jose haurraren familiari laguntzeko izango da.
