LGTBI+ fobiaren Aurkako Nazioarteko Eguna ospatu eta aldarrikatuko dute zapatuan. "Egunero egin beharreko lana izan arren, badaude egun jakin batzuk gure aldarrikapenak ozen plazaratzeko eta zapatukoa da horietako bat", diote Morborreko kideek. "Badirudi LGTBIQ+ pertsonen errealitateari dagokionez aurrerapausoak eman direla, baina oraindik gurekiko gorrotoa bizirik dago. Are gehiago, gorroto hori areagotzen ari da, faxismoaren goraldiaren garai honetan", gaineratu dute.
Oraindik, zoritxarrez, erasoak jasaten dituztela azpimarratu dute. "Mural baten aurkako eraso sotil bat, sare sozialetan pairatzen dugun jazarpena, familietan eta hezkuntza arloan jasaten duguna edota pertsona batzuek sufritzen dituzten eraso fisikoak. Zoritxarrez, egiturazko arazo bat izaten jarraitzen du eta gizarte hau ez dago prest sexu genero disidente batentzat. Lan handia dago egiteko eta gorroto hori salatzeko egun bat da zapatukoa, baina baita aldarrikatzeko ere".
Egoera iraultzea gizarte osoaren lana dela ere argi utzi gura izan dute: "Askok errealitate faltsu bat irudikatu gura dute, esanez lobbyen eta zenbait politiken jabe garela. Errealitatea da oraindik oso bazterrekoak garela eta hori salatuko dugu, bizitza bizigarriagoen alde lan egin nahi dugula aldarrikatuz. Eta hori ez da gure lana bakarrik, gizarte osoak egin beharreko lanketa da".
