![[AZKEN ORDUKOA] Bertan behera geratu da bihar, zapatua, Seber Altube plazan egin behar zuten Debagoieneko Literatura Azoka](https://goiena.tok-md.com/argazkiak/Ung/Debagoieneko_Idazleen_Azoka_Aretxabaletan_2023.JPG)
"Arrasateko Udaleko ordezkariek jakinarazi berri digute biharko aurreikusita dauden haize zakarrak eta eguraldi txarraren eraginez, ezingo dutela Seber Altube plazan egin behar genuen Literatura Azokan karparik jarri arriskutsua izan daitekeelako; hori horrela, pena handiz, bertan behera utzi behar izan dugu azoka. Hala ere, ahalegina egingo dugu lehenbailehen berriz antolatzeko", azaldu du Leida elkarteko kide Judit Ruiz de Munain idazleak.
Leida elkartearen aurkezpena ere bertan behera
Hamar idazletik gora ziren bihar, zapatua, 11:00etan hasita, euren argitalpenak saltzeko eta irakurleekin hartu-eman zuzenak izateko gogoz. "Gema Iñiguez, Josune Murgoitio, Jaione Fernandez de Jauregi, Judit Ruiz de Munain, Arivalia, Ander Santiago, Iker Murillo, Itxasne Barandiaran, Lukene Igartua, Izar Mendiola, Sara Vitoria eta Intxorta Kultura Elkarteko kideak ginen joatekoak, baina ateak zabalik ditugu idaztea gustuko duten guztiendako, elkartean parte hartzeko zein laster antolatu gura dugun azokan euren produktuak saltzeko. Parte hartu gura duenak idatz dezala leida.elkartea@gmail.com helbidera", azaldu dute Leidakoek.
