Harreman Denda bailarako bi tokitan izango da maiatzean. Batetik, maiatzaren 10ean, Aramaioko Lorabarri azokan hartuko dute parte, "bidezko merkataritzako produktuak salduz eta horien inguruko informazioa herritarren esku jartzeko", dendako kideen esanetan. Bestetik, maiatzaren 17an, Antzuolako San Isidro azokan egongo dira, Anelkar gobernuz kanpoko erakundearen eskutik.
Adierazi dutenez, bidezko merkataritzaren "kontsumo etikoak" hainbat onura dauzka, eta horiexek azpimarratu nahi dituzte: "Nekazariek lan-baldintza egokiak dituzte, haur edo pertsona nagusien esplotaziorik gabe; prezio justua jasotzen dute; genero berdintasuna, antolakuntza demokratikoak eta kimikorik gabeko laborantzak sustatzen dira; eta ingurumenaren errespetua bermatzen da".
Era berean, giza eskubideak eta ingurumena babesten duen merkataritza eredua bultzatzea "ezinbesteko"a iruditzen zaie, "globalizazioak eta multinazional handiek eragiten dituzten injustiziei aurre egin eta gure planeta salbatu nahi badugu".
Inplikazioa eskatu dute
Hori dela eta, herritarrei, baina batez ere, Debagoieneko udal, enpresa eta eragile sozialei "merkataritza justuago baten aldeko inplikazioa" eskatu nahi diete. "Adibidez, herriko jai, kirol edo kultura ekimen ezberdinetarako erosketa etikoak eginez, hezkuntza zentroetarako informazio hitzaldiak antolatuz, opari ofizial eta abarretan, bidezko merkataritzako produktuak eskainiz eta abar".
Dagoeneko, bailarako hainbat eragilek Harreman Dendarekin kolaboratzen dute, besteak beste, Arrasateko Udalak, Bergarako Udalak, Fagor Taldeak, Ibai-arte merkatarien elkarteak eta Goienetxe Fundazioak. "Gero eta gehiago gara. Ea denon artean, justizian oinarritutako merkataritza hau hedatzea lortzen dugun", nabarmendu dute.
