Leintz Bailarako Ekiolako Kontseilu Errektoreak "irmoki arbuiatu" du kooperatibako mahaikide eta Fagor Taldearen ordezkari Aritz Otxandianoren aurkako erasoa. "Aritzek energia berriztagarrien hedapen bidezko eta ordenatua defendatu du publikoki, gure kooperatibatik sustatzen dugun trantsizio energetiko justu eta demokratikoarekin bat eginez. Ongi komunarekin eta garapen iraunkorrarekin konprometituta dauden ahotsak isilaraztea bilatzen duen edozein indarkeria edo mehatxu forma baztertzen dugu", nabarmendu dute oharrean.
Bide batez, "elkartasun osoa" adierazi diote Otxandianori eta haren familiari. "Errespetuaren, bizikidetzaren eta adierazpen askatasunaren aldeko konpromisoa berresten dugu", gaineratu dute.
