Arrasate Euskaldun Dezagun elkarteak beste urte batez antolatu du San Juan jaietarako lelo lehiaketa eta, ohi moduan, Udalak San Juan jaietarako aterako dituen euskarrietan erabiliko dute aukeratutako leloa. "Erabilera hori kontuan hartuta, esaldi laburra eta argia izatea baloratuko da", diote antolatzaileek.
Arrasaten bizi, ikasi edo lan egiten duen edonork parte har dezake lehiaketan, taldean edo bakarka. "Partaide edo talde bakoitzak nahi beste lan aurkez ditzake", azaldu dute. Esan moduan, lanak maiatzaren 14a baino lehen bidali beharko dira aed@aedelkartea.eus helbidera. "Leloarekin batera, egilearen edo egileen izen-abizenak eta telefonoa zehaztuko dira".
Jasotako leloetatik hiru finalista aukeratuko ditu AEDk osatutako epaimahaiak eta irabazlea herritarrek aukeratuko dute bozketa bidez, maiatzaren 17an, AEDren Instagrameko kontuan.
Saria 100 eurokoa izango da, nahiz eta saria eman gabe ere gera daitekeen, epaimahaikoek horrela erabakiz gero.
