Gaur egun, 14.075 bazkide ditu bibliotekak, biztanleen %64, iaz baino lau puntu gehiago. Hala jasotzen du 2024ko memoriak. Era berean, Kulturaten 70.085 dokumentu daude eta Santa Marinako auzo bibliotekan, 7.198. Beraz, Arrasateko Udal Bibliotekak 77.283 dokumentu ditu guztira.
Liburuen maileguari dagokionez, %10eko hazkundea izan du 2024an –2023an %4 igo zen–. "Kulturaten 41.488 liburu, disko, aldizkari eta bideo mailegatu genituen. Santa Marinan, aldiz, 2.504 dokumentu mailegatu ziren", azaldu du Asun Agirianok, Arrasateko Udal Bibliotekako zuzendariak.
Liburu elektronikoen mailegu kopurua ere nabarmentzekoa da. Izan ere, eLiburutegia plataformaren bitartez egindako mailegua %23 hazi da eta EAEko 10.000 biztanletik gorako udalerrietan lehen postuan dago Arrasate. Plataforma horren bidez, maileguan hartu daitezke liburu elektronikoak, online pelikulak, audio-liburuak eta aldizkari elektronikoak.
Gazteek euskaraz eta helduek gaztelaniaz
Memorian jaso dituzten datuen arabera. "Liburuen aukeraketan oinarrituta, haur eta gazteek euskaraz irakurtzen dute gehienbat eta helduek gaztelaniaz. Helduen generorik gustukoena intriga eta nobela beltza da, gaztelaniaz, eta euskal irakurleak denetik irakurtzen du, eleberria nagusi den arren. Haurrek album ilustratuak eta ipuin klasikoak aukeratzen dituzte irakurtzeko eta gazteek komikiak, batez ere. Harrigarria da komikia zenbat igo den gazteen artean", dio Agirianok.
Balorazioak, galdetegi bidez
2024. urte hasieran, galdetegi bat jarri zuten martxan erabiltzaileen artean, liburutegiko zerbitzuei buruz dituzten iritziak ezagutzeko. Balorazioen artean, honako hauek daude, besteak beste: "Eskaerak azkar erantzuten ditugula eta, gehienetan, modu positiboan; literatura solasaldiak ere oso ondo baloratzen dira; animazioari erreparatuta, haur txiki-txikientzako ipuin kontaketak, tailerrak eta lehiaketak dira arrakastatsuenak; ordenagailu eramangarrien zerbitzua, iaz martxan jarri eta aurten sendotu duguna, ondo baloratu da, erabilgarri ditugun zazpi ordenagailuak 141 aldiz mailegatu baitira". Azkenik, aipatzekoa da Ikasteko Gelarako 350 txartel banatu dituztela.
Santa Marinakoa handitzea da asmoa
Azkenik, 2025erako erronka nagusien artean, Santa Marina auzoko liburutegia handitzea dagoela nabarmendu du Agirianok, "erabiltzaileen erosotasuna hobetzeko gune gehiagorekin".
