Instalazio berri horrek 137,76 kilowatteko eremu fotovoltaikoa sortzen du, Udalaren arabera. "Modu praktiko batean ulertzeko, instalazioak 140.000 kilowatt-orduko ekoizpena emango duela kalkulatzen dugu, 46 etxebizitza inguruk kontsumitzen duten energia ekoizpena izango litzatekeena", adierazi du Kepa Urteaga zinegotziak.
Neurri horrekin, Arrasateko Udalak "urrats berri bat" egingo du trantsizio energetikoan. "Ezinbestekoa dugu trantsizio energetikoan aurrerapausoak ematea eta energetikoki jasangarriak diren sistemetara jauzi egiten jarraitzea. Uarkapeko plaka fotovoltaikoak jasangarritasunaren bidean kokatzen gaitu", dio Urteagak.
Lanak egiteko aurrekontua 110.924,12 eurokoa izan da (BEZ barne), eta Iniciativas de Tecnología y Sostenibilidad SL enpresak egin ditu.
