Otalora Lizentziaduna eta Zarugalde kaleetako hainbat komertziok eta zerbitzuk sortu dute Loralde elkartea, "komunitate kolaboratiboa" sortzeko helburuarekin. "Hasierako ideia Tipi-Tapa, Josle eta Garraxi dendek izan zuten, baina geroz eta establezimendu gehiagok egin dute bat gurekin. Helburua da inguru hau dinamizatzea, askotariko ekintzak eginez", azaldu dute. Era berean, Arrasateko Udalaren babesa ere badu elkarteak.
Gaur-gaurkoz, honako establezimendu hauek osatzen dute elkartea: Bim Bam Bum, Branca, Garraxi, Goiena Komunikazio Taldea, Idiomaster, Josle, Richi, Tipi-Tapa eta Zapping.
Azaroan egin zuten lehen ekintza, baserritar jantzien desfilea, eta orain bigarren eskuko liburuen azokarekin datoz. Esan moduan, Monterron jauregiaren ondoan egingo dute, zapatuan, 11:00etatik 15:00etara. "Gainera, Debagoieneko hainbat idazle egongo dira azokan, haien liburuak sinatzen. "Uste dugu Gabonetako opari polita eta originala izan daitekeela sinatutako liburu bat", nabarmendu dute elkarteko kideek.
Honako idazle hauek egongo dira azokan: Ander Santiago Vega; Arivalia; Dirk Morenweiser; Gemma Iñiguez; Iker Murillo; Intxorta 1937 Elkartea (Juan Ramon Garai); Itsaso Larrauri; Jaione Fernández de Jauregui; Jon Andueza; Josune Murgoitio; Judit Ruiz de Munain; Marian Porcel; Raul Aldabe eta Roberto Telleria.
