Udalak ez du Udalatxen berriro ere gurutzerik jartzeko aukera ikusten, natur gune izendapena duelako. 2016. urtetik, Udalatx natur gune babestua da eta ezin da bertan eraikuntza lanik egin. 164. artikuluak dioenez, "Ezin da eraikin edo instalazio berririk egin". Legearen helburua gunea babestea denez, Udalak ez du aurreikusten gurutze berri bat eraikitzea.
Udaltzaingoak ikerketa bat hasi zuen gertatutakoa jakin bezain laster, baina udal ordezkariek azaldu dutenez: "ikerketa ez da ari ematen emaitza ziurrik, izan ere, gurutzea zegoen ingurua garbi agertu da, eta ez dago gurutzearen zantzurik", kokapenak eta gauez egin izanak testigu presentzialen falta agerian utzi duela gaineratu dute.
Astelehenean alkateak bilera berezi bat deitu zuen Udalbatzan ordezkaritza duten alderdi guztiekin, gaiaren inguruko informazioa partekatzeko. Bertan, alderdi guztiei jakinarazi zitzaien ikerketaren egoera eta Gobernuak eskatutako txosten teknikoak.
Gaur, asteazkena, alkatea Besaide Mendi Elkartearekin eta Mondraitz elkartearekin bildu da, gaiaren inguruan hitz egiteko asmoz. Informazio guztia partekatu eta Udalatx babesteko beharrarekin konforme agertu dira bertaratu direnak. Horrekin batera, Arrasate Zientzia Elkartearekin eta mendiari lotutako beste elkarte batzuekin ere hainbat hartu-eman izan ditu Udalak.
