Ezusterik ezean, 2024-2025 ikasturteko tasak onartuko ditu datorren astean udalbatzak, oraindik aldatu gabe dauden azken tasak. INEren (Instituto Nacional de Estadistica) arabera, 2023ko apiriletik 2024ko apirilera %3,3ko hazkundea egon da ondasun eta zerbitzuen kontsumoaren batez besteko prezioetan. Hori kontuan izanda, Ogasun Batzordearen proposamena da ikasturteko tasak %3 igotzea.
Azken bi agintaldietan ez da tasa igoerarik egon, eta "hori ezin da kudeaketa eredua izan", Udal Gobernuaren esanetan. "2015-2023 epealdian KPIa %21 igo den bitartean, tasak ez dira igo, eta, ondorioz, zerbitzu hauen defizit ekonomikoa geroz eta handiagoa izan da", dio Joseba Ezpeleta Ogasun batzordeburuak. "Joera hori amaitu beharra dago", gaineratu du.
Izan ere, aipaturiko igoera "jasangarria" dela adierazi du Ezpeletak, horretarako adibide batzuk jarriz: "Kirol ikastaroetan, adibidez, igoera 0,42 eta 1,19 euro artekoa da, edota euskaltegiko ikasle arrunt batentzat 0,04 euroko igoera".
