Arrasateko EAJk prentsa agerraldia egin du, BAZen ordutegi aldaketekiko desadostasuna azaltzeko. "Ordutegi berriak 524 orduko murrizketa dakar, hau da, %22,5eko murrizketa zerbitzuaren erabilgarritasunean. Zehazki, 2023an, zerbitzu hau 227 arratsaldetan zegoen eskuragarri, eta 2024an, berriz, 45 arratsaldetan soilik egongo da irekita", diote.
Jeltzaleek azpimarratu dute BAZ "funtsezkoa" dela Arrasaten. "Udalarekin aurrez aurreko izapideak egiteko aukera ematen du, hala nola, galdutako objektuen kudeaketa, beste administrazio batzuetan sartzeko erregistroa, sinadura digitalaren tramitazioa, errolda eta Udaleko sailekin telefonoz harremanetan jartzeko aukera, besteak beste". Hori dela eta, honako galdera planteatu dute: "Herritarrak 15:00etatik aurrera Udalarekin harremanetan jartzeko eta errolda bezalako oinarrizko izapideak egiteko egun librea eskatzera behartuta egongo dira?".
EAJrentzat "ulertezina" da, 2022an udalbatzak aho batez finantza-erakundeei leihatilak mantentzeko eskatu ostean, Udal Gobernuak zerbitzu publikoa murriztea erabaki izana. Hori dela eta, Gobernuari eskatu dio erabaki hori berriz aztertzeko eta aurretik indarrean zegoen BAZeko herritarrei arreta emateko ordutegia mantentzeko.
