"Galera handia da Arrasateko Atletiko Taldearendako, Joshe-k ekarpen handia egin duelako herrian, bai kirol mailan eta baita bestelako gizarte arlotan ere. Arrasate Atletiko Taldetik dolumin zintzoenak bidali nahi dizkiogu Elorza-Heriz familiari, baita Arrasateko familia atletiko osoari ere", adierazi dute klubetik.
Jose Ignacio Elorza 1969tik dago Arrasateko atletismora lotuta, klubetik gogorarazi duten moduan: "Arrasaten atletismoak izan duen sustatzaileetako bat izan da; urte hauetan guztietan atleta, entrenatzaile eta zuzendari izan da. Eskerrak eman nahi dizkiogu Joshe-ri, urte hauetan egin duen lanagatik, klubean egin duen ekarpenagatik eta irakatsi digun guztiagatik. Etorkizuneko belaunaldiei bere pasioa eta balioak transmititzen saiatuko gara".
Minutu bateko isilunea, domekan
Hain zuzen, bihar, domeka (12:30) Arrasate Atletiko Taldeak antolatzen duen Koadrilen Arteko Santamas krosean minutu bateko isilunea gordeko dute Elorzaren omenez. Arrasatearra urtero egoten zen antolatzaile lanetan bertan, edo klubarendako argazkiak egiten, horiek zirelako bere pasioetako bi, atletismoa eta argazkilaritza.
Gaur, zapatua, egingo dute Jose Ignacio Elorzaren aldeko hileta elizkizuna, San Juan Batailatzailea parrokian (19:00).