Ordu eta erdi pasatxo iraun zuen emanaldia musika doinuekin hasi zen. Iñar Sastre musikariak solo bat jo zuen pianoarekin eta, ondoren, Olatz Prat kazetari eta abeslaria, saioaren gidaria, batu zen oholtzara euskarazko Mikel Laboaren Lizardi abesteko, Sastre pianoan zela. Horren ostean, Anne Etchegoyen izan zen abestu zuen hurrengoa –Baratze bat kantatu zuen– eta gero batu ziren, Joxemari Iturralde eta Joseba Sarrionandia idazleak, hurrenez hurren.
Tertuliarekin hasi aurretik, bakoitzak olerki bat irakurri zuen; Sarrionandiaren kasuan, Mahmud Darwish poeta palestinarraren poesia. Solasaldiaren hasieran, Pott Bandaren hastapenak izan zituzten gogoan eta euskal literaturaren egoera nahiz itzulpengitza izan zituzten hizpide, besteak beste. Publikoak ere parte hartu ahal izan zuen galderak eginez eta jendartean zegoen gizon batek botatako galderari erantzunez, euskarak bizirauteko jarraitzeko moduez euren iritzia eman zuten bi hizlariek: euskarak bizirauteko batua ala tokian tokiko euskalkia?
Anekdotak eta aurrerapenak
Solasaldian zehar anekdotak ere izan zituzten berbagai; esate baterako, h letra edota amaiera aldera Kuban bizi zen garaian "eskribau" izan zenekoak. Hortaz, abesteaz gain, barre ere egin zuen publikoak. Era berean, Sarrionandiak adierazi zuen, egun horretan bertan amaitu zuela liburu bat editatzen eta haren nondik norakoak ere kontatu zituen. Durangoko Azokarako prest egongo dela aitortu zuen.
Halaber, ez zen lan berria kaleratuko duen bakarra; izan ere, Anne Etchegoyenen disko berriak argia ikusiko du eta primizian Festa abestia entzun nahi haren koroak egin ahal izan zituzten bertaratutakoek, eta azkenik, Olatz Pratek eta publikoak, denek batera, Izotz ondoko eguzki abestuz eman zioten amaiera arratsaldeari.