Hainbat urtez Arrasateko 12 eta 17 urte arteko nerabe askoren bilgune izan da Musakolako gaztetxokoa, baina eraikina bota beharrean dira, ikastetxearen proiektu berria dela eta.
Hori dela eta, agur ekitaldia egingo dute egubakoitzean, 17:30ean aurpegi-margotzearekin hasita. Gero, 18:00etan, Musakolako gaztetxokoarekin lotura zuzena eta berezia duten Rebel Noise eta Hankaz gora taldeen kontzertu akustikoak entzun ahalko dira, eta 19:00etan afari musikatua egingo dute.
Ekintzak auzotar guztiei zuzenduta egongo dira, ez bakarrik nerabeei. "Urte askotan zehar gaztetxokoaren inguruan hainbat eta hainbat gaztek bizi izan dituzten momentu berezi asko gogoratzeko unea izango ostiraleko jaia. Beraz, auzotar guztiei parte hartzeko gonbidapena luzatzen diegu", azaldu dute Arrasateko Udaletik.
Kokapen berria, erabakitzeke
Lekualdaketari dagokionez, Arrasateko Udal Gobernuak azaldu du hainbat aukera aztertzen ari direla gaztetxokoa jartzeko, baina oraindik ez dutela erabakita, ez lekua, ezta data ere.
