Ekimen parlamentario bat gura du Intxorta 1937 Kultur Elkarteak, "egia jakiteko"

Eneko Azurmendi Barrena 2023ko ira. 18a, 17:56
1936ko gerran hildakoei iaz egindako omenaldia.

Euskal Herriko diputatu hautetsiei ekimen parlamentario bat sustatzeko dei egin die elkarteak, "1936ko gerran desagertutako pertsonen dokumentazio guztia, Guardia Zibilaren artxiboetan baitago, Memoria Historikoaren Dokumentazio Zentrora eroan dezaten, eta gero senideei bidali diezaieten". Irailaren 26an egingo diete hildakoei omenaldia, urtero moduan.

Intxorta 1937 Kultur Elkarteak egia eskatzen jarraitzen du 1936ko gerran gertatutakoari buruz. "87 urte igaro dira gure aitajaun-amandreak, pertsona zibilak zirenak, hil zituztenetik. Desagertuta jarraitzen dute. Ez dakigu egia osoa. Haien salatzaileek eta hiltzaileek ez zuten eskatu inoiz barkamenik. Eta Justiziak jarraitzen du beste albo batera begiratzen", adierazi dute.

Hala, Euskal Herriko diputatu hautetsiei ekimen parlamentario sustatzeko dei egin die, "dokumentazioa eroan dezaten Memoria Historikoaren Dokumentazio Zentrora eta leku horretatik dokumentazioaren kopia bat bidali diezaieten pertsona zibil desagertuen senideei".

Barne Ministerioaren erantzuna

Espainiako Barne Ministerioak, bestalde, erantzun ofiziala eta dokumentatua eman dio, lehenengoz, Arrasatetik desagertutako pertsonen hiru bilobek egindako eskaerari: Gregorio Sampedro Azpiazu, Jose Antonio Urionabarrenetxea Isasmendi eta Florencia Olazagoitia Ceciaga. Honako hau dio erantzunak: Guardia Zibilak atxilotu zituen. (Arrasaten agintari zibil eta militar nagusiak ziren Jesus Gorosabel Mendia alkatea eta Rafael Latorre Roca teniente koronela). Gobernadore zibilaren (José María Arellano Igea) esku jarri zituzten, eta hark Ondarretako espetxera eroan zituen, egun batzuk geroago plazako epaile militarraren (Ramiro Llamas del Toro komandantea) esku jartzeko.

Intxorta 1937 Kultur Elkarteko kideentzat, ordea, erantzuna ez da nahikoa. "Ez digute esaten zer gertatu zitzaien gero; baina badakigu jakin inoiz ez zirela itzuli Arrasatera". Era berean, "gabezia demokratikoa" salatu dute. "87 urte igaro eta gero gure senideen dokumentazioa ez egotea artxibo zibiletan eta Guardia Zibilaren artxiboetan jarraitzea gabezia demokratiko hutsa da. Horrek ez ditu errespetatzen pertsona desagertuei buruzko nazioarteko eskubideak". Izan ere, CIRC Gobernuetako eta gobernuz kanpoko adituen Nazioarteko Konferentziak eskubide hori aitortzen du.

Florencia Olazagoitia Ceciaga, Gregorio Sampedro Azpiazu eta Jose Antonio Urionabarrenetxea Isasmendi. (Argazkiak: Intxorta 1937 Kultur Elkartea).

Irailaren 26an, lore eskaintza

Jakina da Debagoieneko 123 gizon eta emakume hil zituztela kolpistak bailaran sartu zirenetik. "Gure ustez, gutxienez 47 zibil, Arrasate, Oñati, Bergara, Aretxabaleta, Eskoriatza eta Gatzagakoak, egoera berean egongo lirateke, eta ehunka gehiago Gipuzkoako beste eskualde batzuetan", diote elkartetik.

Urtero moduan, 1936ko gerran hildakoei lore eskaintza egingo diete Arizmendiarrieta plazako monolitoan, irailaren 26an, 18:30ean.

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak