Ikasgela horietako bat Arrasaten egongo da eta bestea, Bilbon eta horietan garatuko dituzte, besteak beste, datu-teknologiaren, datu-analisiaren, garapen teknologikoaren eta kontsumorako finantzaketaren alorreko proiektuak.
Bi erakundeek 2021ean sinatu zuten esparru-akordio bat berrikuntzaren, ekintzailetzaren eta talentuaren arloetan lankidetzan jarduteko eta oraingo hitzarmena horren barruan dago. Sinadura ekitaldian elkartu dira Carlos Garcia, Mondragon Unibertsitateko Goi Eskola Politeknikoko koordinatzaile nagusia; Lander Beloki, Mondragon Unibertsitateko Enpresagintza Fakultateko dekanoa; eta Nuria Agirre, Laboral Kutxako Gestio Sozialeko zuzendaria.
Ingeniariak eta enpresagintzako ikasleak
Arrasateko Laboral Kutxa Ikasgelako ingeniaritzako ikasleek datu-teknologiaren, garapen teknologikoaren eta altxortegiaren alorretako soluzioak garatuko dituzte lehen urtean. Bilbon, ostera, Enpresagintza Fakultateko ikasleak elkartuko dira datu-analisiaren eta kontsumorako finantzaketaren alorretako proiektuak lantzeko.
Prentsa-ohar bidez adierazi dute Laboral Kutxarentzat oso garrantzitsua dela entitatean integratzeko gai diren talentu gazteak erakartzea. Horregatik, kanpoko praktika akademikoak sustatuko dituzte: "Ikasleek prestakuntza akademikoan ikasitakoa aplikatu eta osa dezaten, eta beharrezko trebetasunak lor ditzaten, lanbide-jarduerarako prestatzeko, enplegagarritasuna hobetzeko eta ekintzailetza-gaitasuna sustatzeko".
