Dultzaineroen gaita eta danbor hotsek lagunduta, Herriko Plazan ekingo diote kalejirari, eta alde zaharreko kaleetan barrena arituko dira jira eta bira. Aurtengo honetan, 60 neska-mutil inguru ibiliko dira erraldoi, kiliki, zaldiko eta laguntzaile artean ospakizuna aurrera eramaten. 2023ko San Juan jaiak lehertzear daudela, motorrak berotzen dihardute konpartsako kideek. Aurten, bi agerraldi egingo dituzte, goizeko hamaiketan hasita: lehenengoa hilaren 24an izango da, zapatua, eta bigarrena, aldiz, 26an, astelehena. Gomez Gonzalez Butroikoak eta Elvira Leibakoak osatutako erraldoi bikotea eta Martin Bañezek eta Juantxo Otxoak osatutakoa irtengo dira kalera. Haiekin batera Errementaria, Mari, Basajaun eta Lamina ere ibiliko dira kaleak girotzen. Hain zuzen ere, zortzi kilikik lagunduko diete ibilbidean zehar, lau zaldikorekin batera. Azken horiek umeei, gazteei zein nagusiei ipurdiko bat edo beste emateaz arduratuko dira. Egun bakoitzean ibilbide desberdina egiteko asmoa dute antolatzaileek alde zaharrean zehar; izan ere, zapatuan Herriko Plazan bukatuko dute kalejira eta astelehen, ordea, Biteri plazan.
Arropa berriak
Aurtengo berritasunetako bat erraldoien jantzi berriak izango dira, eta, horren harira, Gari Arsuaga konpartsako kideak esan du "ilusioz gainezka" daudela erraldoien arropa berriak estreinatzeko.
