Harremaneko ordezkariak pozik azaldu dira zozketak izan duen parte-hartzeagatik. "Eskerrak eman nahi dizkiegu Elkartasun Egunean egon ziren herritar guztiei eta, bereziki, tonbolan parte hartu zutenei. Modu horretan, haien ekarpena egiten baitute gure proiektuetan. Beraz, datozen urteetan ere jarrai dezatela parte hartzen", adierazi dute.
Tonbolako 3.500 txartelak berehala saldu zituzten, 4.020 euroko irabaziak lortuz (sagardoaren salmentaren 225 euroak gehituta). Hala, batutako diru kopuru hori Indiako Mumbai hirian daukan Ankur proiektura bideratu du Harremanek. "Han, 200 neskatila laguntzen ditugu gure proiektuaren bitartez eta haiei bizitza duin bat eskaintzea da gure helburua", diote. Harrera etxe hori Santa Anako karitateko ahizpek kudeatzen dute eta, hain zuzen, haiek arduratzen dira Mumbaien behar gehien duten horiek zaintzeaz.
Ibai-arteri ere eskerrak eman dizkiote Harremaneko ordezkariek. "Sekulako laguntza ematen digu elkarteak eta horren adibide garbiena da 300 euroko bonua. Mila esker, bihotzez!", nabarmendu dute.
Halaber, aurtengo Elkartasun Eguna bereziki jendetsua izan zela azaldu dute Harremaneko kideek eta herritar askok hartu zutela parte ekintzetan. "Gainera, Aita Mari, Hotz, Serso edota Amnistia Internazionala bezalako gobernuz kanpoko erakundeekiko interesa ere erakutsi zuten askok eta Harreman Dendako txokolate-jana ere oso arrakastatsua izan zen".
