"Bada garaia autismoaren gaia ezkutuan eramatetik plazara ateratzeko". Horixe da AEN ikusarazteko kolektiboaren leloetako bat. 2022an antolatutako festa baten harira hasi ziren Aretxabaletan elkartzen egoera hori lehen pertsonan edo gertu-gertutik bizi duten herritarrak. Saretu eta elkar ezagutzen joan ondoren, hitzaldi bat antolatu zuten Arkupe aretoan apirilaren 20rako, egunerokotasunean pertsona autismodunekin lan egiten duten profesionalak gonbidatuta. Jende askoren interesa piztu zuen hitzordu hark, bete egin baitzen aretoa.
Arrakasta hura baliatuta, hilabeteren ostean Arrasaten emango dituzte gaiari buruzko ikuspuntuak. Mahai-inguru horretarako, zerbitzu integrala ematen duen Gautena elkarteko psikologo bat, Esan Logopedia zentroko logopeda bat, integrazio sentsoriala lantzen duen Kulunka elkarteko terapeuta bat, Arizmendi Ikastolako psikopedagogo bat eta tutore bat eta Zaldubi Ikastolako gizarteratze teknikari bat gonbidatu dituzte. Profesional horien testigantzei AEN duten haurren gurasoenak eta espektroan dauden helduenak batuko zaizkie, eta, bukaeran, afari-merienda egongo da guztientzat, Arrasateko zenbait ostalarik prestatuta.
Ateak zabalik
Gizartea AEN duten pertsonetara moldatzeko erronka du taldeak, "mundua ez baitago beraientzat eginda, eta, ondorioz, etengabe egokitu behar baitute errealitatera". Jakitun dira jendea gaiaz sentsibilizatzea dela eman beharreko lehen pausoa: "Ez baita gaixotasun bat, kondizio bat baizik; kontua da lanketa berezia eskatzen duela, ez baitira pertsona normalak. Baina nor da normala?", galdetu zuten Aretxabaletan.
