Ibai-artek iaz egin zuen lehenengoz moda-desfilea eta, eguraldiak baldintzatuta Amaia antzokian egin behar izan bazuten ere, arrakastaz beterikoa izan zen, aretoa lepo bete baitzen. Hori ikusita, aurten ere errepikatu egingo dute eta zapatuan izango da, apirilak 22, Herriko Plazan, 19:00etan hasita. "Iaz Bilbotik etorri ziren modelo batzuk eta berandu etorri ziren, elurraren ondorioz. Oso eguraldi txarra zegoen eta, hala ere, arrakastatsua izan zen. Hori gure alde dugu eta espero dugu aurtengoa ere halakoa izatea", adierazi du Jon Apraizek, elkarteko kideak. "Oso ezberdina da kalean egin edo Amaia antzokian egin. Antzokira espresuki joan behar dira herritarrak eta, kalean egin ezkero, paseoan dabilen bat ere gelditu daiteke desfilea ikusten".
Zapaturako eguraldi iragarpena ez da guztiz garbia eta astean zehar hartuko dute behin-betiko erabakia. Edozelan ere, Ibai-arteko kideek garbi daukate Herriko Plazan egin gura dutela. "Herriko ekintza bat da, herritarrei begira antolatutakoa eta, beraz, kalean izan behar da. Horri garrantzi handia ematen diogu guk, antolatzen ditugun ekintzekin lortu nahi dugulako herriko kaleak girotzea. Helburua da arrasatearrek ikustea Ibai-arte bizirik dagoen elkarte bat dela eta gu hor gaudela edozertarako", dio Apraizek.
65 modeloak, debagoiendarrak
Modeloei dagokienez, 65 ariko dira aurten pasarelan, eta guztiak debagoiendarrak izango dira. "Ez da erraza lentzeria jantzita pasarelara irtetea eta horregatik etorri ziren Bilbotik modelo batzuk. Aurten, hala ere, hemengoak izango dira guztiak". Horien profila ere zaindu egin dute eta askotarikoak izango dira. "Gizonezkoak faltako zitzaizkigula uste genuen eta azkenean hamalau izango dira. Egia da gehiagorekin orekatuago geratuko litzatekeela, baina ez da kopuru txikia". Halaber, haurrek hartuko dute parte, baina baita adineko pertsonek ere.
Iaz baino bi establezimendu gehiago
21 establezimendutako produktuak egongo dira ikusgai zapatuko desfilean, izan ere, hamasei saltokik, hiru ile-apaindegik eta bi estetika-zentrok hartuko dute parte: Allure Estilistak, Angela Estetika Zentroa, Bea Lentzeria, E&G, Elkoro Osagarriak, Ennea, Intersport Loramendi, Itxaso, Josle, Kapikua, Kili-Kolo, Lirain, Markiegi, Oskarbi, Peluqueria Xarma, Portaloi Optika, Resusta Karrikiri, Sikol, Tipi-Tapa eta Troko. Esan behar da iaz baino bi gehiago dira, iaz hemeretzi establezimendu izan baitziren.
Gainera, aurten ere Artgazki elkarteko kideak ariko dira argazkiak ateratzen.
