Era horretan, azaldu duenez, asmoa da Diputazioak "gizarte larrialdiko zerbitzuaren bidez ematen duen arreta indartzea, emakume bakoitzari erantzun integral eta guztiz pertsonalizatua" emateko. "Krisian esku hartzeko hiru zerbitzuak eta mahaia aktibatu ditugu, oraindik bete ez diren beharrei erantzuteko eta birbiktimizazioa saihestu ahal izateko".
Halaber, ez dute zehaztu non kokatuko duten babes zentroa, batzarrean Arrasateko Udalak parte hartu duen arren, beste bailara batzuetako udalekin batera.
Oinarri partekatuak
Maite Peña Gipuzkoako Foru Aldundiko Gizarte Politiketako diputatuak azaldu du bortizkeria matxistaren arazoaren konplexutasunak eta izaerak berariazko esku-hartze eredu bat hartzea eskatzen duela, eta, horretarako, printzipio eta gako batzuk definitu dituztela. "Zehazki, hobekuntza arloak identifikatu dira, eta, ondorioz, arreta ereduaren funtsezko printzipioak jardunbide zehatzetan ezartzen laguntzen duten jarraibide zehatzak sortu dira. Orain, ikuspegi hori indartuko dugu Gipuzkoan indarkeria matxistaren aurreko arreta koordinatzeko erakunde arteko mahaia aktibatuta".
Haren arabera, ondorioetako bat da intersekzionalitatetik eta ahalduntzetik jardun behar dela, esku-hartze estrategiari jarraituz. "Hala nola, integraltasuna, pertsonarengan oinarritutako plangintza, birbiktimizaziorik eza, erresilientzia eta parte hartzea. hori guztia esku hartze komunitarioko eredu batetik".